തിരുവനന്തപുരം: കേരളത്തിലെ പൊതുവിദ്യാലയങ്ങളിലെ മികച്ച മാതൃകകൾ പങ്കുവയ്ക്കുന്നതിനും വിദ്യാലയങ്ങളുടെ മികവുകൾ പ്രോത്സാഹിപ്പിക്കുന്നതിനുമായി കേരള ഇൻഫ്രാസ്ട്രക്ചർ ആൻഡ് ടെക്നോളജി ഫോർ എഡ്യൂക്കേഷൻ (കൈറ്റ്) സംഘടിപ്പിച്ച വിദ്യാഭ്യാസ റിയാലിറ്റി ഷോ ‘കൈറ്റ് ഹരിതവിദ്യാലയം 4.0’യുടെ ഗ്രാൻഡ് ഫിനാലെ ഇന്ന് നടക്കും.
തിരുവനന്തപുരം നേമത്തുള്ള അൽ-സാജ് കൺവൻഷൻ സെന്ററിൽ ഉച്ചകഴിഞ്ഞ് മൂന്നിനു നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ പുരസ്കാരങ്ങൾ വിതരണം ചെയ്യും. പൊതുവിദ്യാഭ്യാസ വകുപ്പ് മന്ത്രി വി. ശിവൻകുട്ടി അധ്യക്ഷനായിരിക്കും.
മത്സരത്തിൽ ആകെ 50 ലക്ഷം രൂപയുടെ സമ്മാനത്തുകയും ഐസിടി ഉപകരണങ്ങളുമാണ് നൽകുന്നത്. പ്രൈമറി, സെക്കൻഡറി-ഹയർസെക്കൻഡറി വിഭാഗങ്ങളിൽ ഒന്നും രണ്ടും മൂന്നും സ്ഥാനം ലഭിക്കുന്ന വിദ്യാലയങ്ങൾക്കും കൂടാതെ സ്പെഷ്യൽ ജൂറി അവാർഡ്, ഫൈനലിസ്റ്റ് എന്നീ വിഭാഗങ്ങളിലും പ്രത്യേക പുരസ്കാരങ്ങൾ ലഭിക്കും.